តើអ្នកតែងធ្លាប់មានការតានតឹងចិត្តជាញឹកញាប់ក្នុងជីវិតប្រចាំថ្ងៃរបស់អ្នក ដូចជាសមាជិកគ្រួសារមានជំងឺ រឺក៏អ្នកជួបបញ្ហាលំបាកអ្វីមួយក្នុងការរស់នៅដែររឺទេ?
អ្នកត្រូវដឹងថាអារម្មណ៍ទាំងអស់នេះគ្រាន់តែជាលក្ខណះធម្មតាមួយសំរាប់មនុស្សរាល់គ្នាតែប៉ុណ្ណោះ។
តើអារម្មណ៍យ៉ាងដូចម្តេចដែរទើបអាចចាត់ទុកថាជាជំងឺថប់បារម្មណ៍?
ជំងឺថប់បារម្មណ៍ គឺជាភាពតានតឹងចឹត្តញឹកញាប់ រឺជាប់ជាប្រចាំទៅលើបញ្ហាមួយរឺច្រើនហើយមានភាពខ្លាំងក្លាទ្បើងៗ, មានរយះពេលយូរនឹងប៉ះពាល់ដល់តួនាទីមុខងារ និងជីវិតរស់នៅប្រចាំថ្ងៃរបស់អ្នក។
តើជំងឺនេះកើតលើតែខ្ញុំម្នាក់មែនរឺទេ?
មិនពិតទេ! ជំងឺថប់បារម្មណ៍ ជាជំងឺផ្លូវចិត្តដែលមានច្រើនជាងគេបង្អស់ក្នុងចំណោមជំងឺផ្លូវចិត្តឯទៀតៗ និងភាគច្រើនកើតលើស្ត្រីភេទ។
តាមការសិក្សាមួយបញ្ជាក់ថាមនុស្សប្រហែល៣៤% ប្រឈមមុខនឹងជំងឺថប់បារម្មណ៍នេះ ក្នុងទូទាំងពិភពលោក។
តើអ្វីទៅជារោគសញ្ញានៃជំងឺថប់បារម្មណ៍?
ជំងឺនេះអាចមានរោគសញ្ញាទៅលើ រាងកាយ ផ្លូវចិត្ត និងអាកប្បកិរិយា។
១. រោគសញ្ញារាងកាយ ៖ បេះដូងដើរញាប់, ចង្វាក់ដង្ហើមខ្លីៗ, វិលមុខ, ស្រវាំងភ្មែក, រោយកញ្ចឹងក,ស្ងួតមាត់, បែកញើសហួសប្រមាណ, ត្រជាក់ចុងដៃ-ជើង, រសេសរសោះ, អស់កំលាំងល្ហិតល្ហៃ, ចុកចាប់តឹងណែនសាច់ដុំ, ក្អួតចង្អោរ, នោមញឹក, ឧស្សាហ៍កេាសខ្យល់, ស្រឺត, ពិបាកគេង-គេងមិនលក់ ។ល។
២. រោគសញ្ញាផ្លូវចិត្ត៖ ភ័យខ្លាចគ្មានហេតុផល, ភ័យខ្លាចស្លាប់ដោយគាំងបេះដូង, គិតច្រើន, ព្រួយបារម្មណ៍និងខ្វល់ខ្វាយច្រើន, អន្ទះសារពិបាកក្នុងការរងចាំ, ពិបាកក្នុងការផ្ចង់អារម្មណ៌, ភ្លេចភ្លាំងច្រើន។
៣. រោគសញ្ញាអាកប្បកិរិយា ៖ មិនហ៊ានធ្វើដំណើរឫនៅតែឯង, ស្រងូតស្រងាត់, ជ្រួលច្រាល, រអ៊ូរទាំច្រើន, ឆេវឆាវច្រើន។
វិធីសាស្ត្រក្នុងការព្យាបាល
-ការព្យាបាលដោយឱសថប្រឆាំងនឹងជំងឺថប់បារម្មណ៍
-ការព្យាបាលតាមបែបចិត្តសាស្ត្រ
-ការសំរាកកាយ-ចិត្ត / ការធ្វើលំហាត់ដកដង្ហើម
-ការព្យាបាលដោយ CES (ការសំរួលផ្លូវចិត្តដោយម៉ាសុីន Alpha-Stim)។