តើអ្វីជាជំងឺធ្លាក់ទឹកចិត្ត?
មនុស្សគ្រប់គ្នា តែងធ្លាប់មានអារម្មណ៍ អស់សង្ឃឹម ស្រងូតស្រងាត់ ឫធ្លាក់ទឹកចិត្ត ក្នុងជីវិត របស់ខ្លួន ប៉ុន្តែសភាពទាំងនោះនឹងធូរស្រាលមកវិញ ដោយខ្លួនឯង។ ទាំងនេះគឺជា ប្រតិកម្មផ្លូវចិត្តធម្មតារបស់មនុស្សយើង នៅពេលដែលមានការបាត់បង់អ្វីមួយជាទីស្រលាញ់។
ផ្ទុយទៅវិញជំងឺធ្លាក់ទឹកចិត្ត ជាជំងឺផ្លូវចិត្ត និងខួរក្បាល។ រោគសញ្ញារបស់វា មានរយៈពេលយូរជាងធម្មតា និងបានប៉ះពាល់ដល់អារម្មណ៌ ការគិត អាកប្បកិរិយា ការងារ និងជីវិតរស់នៅប្រចាំថ្ងៃរបស់យើង។
តើអ្វីជាមូលហេតុនាំឱ្យមានជំងឺធ្លាក់ទឹកចិត្ត?
បញ្ហាក្នុងសង្គមគ្រួសារ
ការខកចិត្ត ការសោកស្តាយ ការបាត់បង់ របស់អ្វីមួយ
ការបាត់បង់មនុស្សជាទីស្រលាញ់
ការប្រែប្រួលដំណើរការក្នុងខួរក្បាល
ជំងឺរាងកាយមួយចំនូន
ការប្រើប្រាស់ឱសថមួយចំនួន
ការប្រើប្រាស់សុរា និងគ្រឿងញៀន
តើជំងឺធ្លាក់ទឹកចិត្តមានរោគសញ្ញាអ្វីខ្លះ?
រោគសញ្ញាញឹកញាប់ដែលអាចកើតមាន៖ (១)រាងកាយ (២)ផ្លូវចិត្ត និង(៣)អាកប្បកិរិយា។
សញ្ញារាងកាយ៖ កាយវិការស្ទក់ៗ ឬឡេសឡាស់ អស់កំលាំង ឬ គ្មានថាមពល បញ្ហាដំណេក មិនឃ្លានអាហារ ឬ ហូបច្រើនពេក។
សញ្ញាផ្លូវចិត្ត៖ បន្ទោសខ្លួនឯង ឬគិតអវិជ្ជមានចំពោះខ្លួនឯង ផ្ចង់អារម្មណ៍និងការចងចាំចុះខ្សោយ មានគំនិតចង់ស្លាប់ និងសំលាប់ខ្លួន ទុក្ខសោក បង្ហូរទឹកភ្នែក អារម្មណ៍ធ្លាក់ទឹកចិត្តរយៈពេលយូរ បាត់បង់ចំណូលចិត្ត និងការសប្បាយ អស់សង្ឃឹម គិតថាគ្មាននរណាអាចជួយខ្លួនបាន គិតថាខ្លួនឯងគ្មានតម្លៃ និងបន្ទោសខ្លួនឯង។
សញ្ញាអាកប្បកិរិយា៖ លំបាកក្នុងការធ្វើសកម្មភាពការងារប្រចាំថ្ងៃ បញ្ហាក្នុងជីវិតគ្រួសារ ដកខ្លួនពីមិត្តភ័ក្ត្រ និងសកម្មភាពសង្គមនានា។
ការព្យាបាលជំងឺធ្លាក់ទឹកចិត្ត
ជំងឺធ្លាក់ទឹកចិត្តជាជំងឺផ្លូវចិត្តដែលអាចព្យាបាលជាសះស្បើយ
ការព្យាបាលដោយឱសថព្យាបាលជំងឺធ្លាក់ទឹកចិត្ត
ការព្យាបាលតាមបែបចិត្តសាស្ត្រ
ការព្យាបាលដោយការរំញោចកោសិកាខួរក្បាល (rTMS)
ការគាំទ្រពីក្រុមគ្រួសារ និងសង្គម